Kæra dagbók

Hætt

Thu, 13 Mar 2008 15:30:07 GMT

Hæ, hæ.
Ég hef ákveðið að hætta hér hjá blogcentral.is og færa mig yfir til blog.is af því að ég er ekki sátt við þær breytingar sem gerðar hafa verið hér. Nýja síðan mín er í vinnslu og er á slóðinni http://pusta.blog.is/ Sjáumst á nýrri síðu :)
Kveðja María.

Nýtt ár, ný tækifæri

Sun, 13 Jan 2008 19:43:01 GMT

Síðasta ár var frábært.

Við hófum árið á því að fara til Kanarí með tengdó sem var æðislegt. Við Óli höfðum aldrei farið erlendis saman áður og þetta var frábært. Við eigum svo bara eftir að fara til útlanda með Hannes Hauk þegar hann er orðinn aðeins eldri. Í mars festum við kaup á íbúðinni okkar, eða fluttum inn þá og hefur okkur liðið alveg frábærlega hér síðan þá. Hún er ekkert voðalega stór en hentar okkur ágætlega og við erum ánægð hér. Ég var að vinna út maí og byrjaði í fæðingarorlofi í júní. Litli prinsinn okkar fæddist svo í júlí, eftir langa bið!! Algjör engill og við erum svo ánægð að hafa fengið hann til okkar. Hann hefur breytt lífi okkar en bara til hins betra:) Í september fékk hann svo nafnið sitt, Hannes Haukur. Athöfnin var mjög falleg en hann var skírður í Fríkirkjunni af séra Einari Eyjólfssyni. Með okkur voru foreldrar okkar og systkini og fjölskyldur þeirra, sem og góðir vinir okkar. Þetta var yndislegur dagur sem verður lengi í minnum hafður. Í október byrjaði Hannes Haukur svo í ungbarnasundi og var það frábær tími og erum við að hugsa um að fara á annað námskeið. Svo í desember fórum við norður í Hrísey til að halda jólin hátíðleg með fjölskyldunni minni og var það frábær tími.

Nú er árið 2008 hafið og ný tækifæri bíða þess að verða gripin. Ég hef sett mér nokkur markmið sem ég ætla að halda fyrir sjálfa mig að svo stöddu og læt ykkur kannski vita af þeim þegar fram líða stundir. Hannes Haukur á eftir að læra helling og gera margt þannig að þetta ár verður bara skemmtilegt:)

Að lokum vil ég óska ykkur öllum heillaríks árs og vona að árið verði ykkur gott.

Kær kveðja María.

Gleðilegt nýtt ár og takk kærlega fyrir það gamla.

Sun, 06 Jan 2008 15:01:20 GMT

Já það er bara komið nýtt ár. Vá hvað tíminn flýgur frá manni, bara þýtur áfram.

Við erum búin að hafa það alveg yndislegt hér í Hrísey. Það er alltaf gott að koma hingað og hér líður mér best. Innan um fólkið sem mér þykir vænst um og er örugg með sjálfa mig. Ég væri sko ekkert á móti því að búa hér, ef ég fengi vinnu hér.

En allt tekur nú enda og þessi dvöl okkar er að verða búin. Við förum sennilega aftur suður á miðvikudag eða fimmtudag. Verður ágætt að hafa nokkra daga heima í litla kotinu okkar áður en Óli þarf að fara að vinna og lífið kemst aftur í fastar skorður.

Vildi bara koma á framfæri þakklæti til allra fyrir liðið ár og ósk til ykkar um heillaríkt og gott ár 2008.

Kærar kveðjur María.

Gleðileg jól allir saman.

Thu, 27 Dec 2007 13:58:58 GMT

Já komið þið nú blessuð og sæl!!

Það er nú heldur betur búið að vera sældarlíf hjá okkur síðustu daganna. Við komum hingað út í Hrísey þann 15. des, til hamingju með daginn Inga Hanna;), og síðan þá er maður búinn að hafa það náðugt.

Við erum búin að fara nokkrum sinnum suðrí Ásgarð til ömmu og afa og Tönju og einu sinni í bæinn að versla smá. Annars erum við bara búin að vera hér úti í Lambhaga; borða, sofa, lesa, leika okkur og bara slappa af. Sældarlíf eins og það gerist best;)

Jólin eru búin að vera alveg yndisleg. Við vorum hér átta í graut á þorláksmessu, ég segi átta af því að hann Hannes Haukur sat við borðið með okkur í barnastól sem ég átti einu sinni og var í fyrir nærri 29 árum síðan. Þetta kallar maður sko nýtingu á hlutunum!!! Svo á aðfangadag þá fórum ég, Narfi Freyr, Haukur og Unnur í messu klukkan sex og mamma og pabbi voru að syngja í kórnum þannig að þau voru þar líka. Óli var heima hjá Hannesi Hauki og Geysi. Messan var frábær og leið mér æðislega að vera komin í kirkjuna heima. Eftir messu var brunað heim í hamborgarhrygg og meðlæti. Alveg hreint frábær matur og Hannes Haukur sat hjá okkur en fékk ekki neitt að þessu sinni. Það kemur að því að þú færð eitthvað með okkur elskan mín:) Eftir matinn var gengið frá og vaskað upp og svo var farið í það að taka upp pakkana. Og vá!! Það var svo mikið af pökkum hér, náði langt út fyrir tréð og hefur held ég aldrei verið svona mikið af pökkum hér áður. Pabbi sá um það að lesa á merkimiðana og færa okkur pakkana og ég held að hann hafi verið að flýta sér eitthvað kallinn af því að við höfum aldrei verið eins fljót að taka upp og núna!!! Við Óli fengum heilann helling eins og t.d. kaffikönnu, hnífaparasett, töfrasprota, teketil, trefla,jólaskeið, jólaskraut, jólasvein, konfekt og svo fékk ég eina sér gjöf sem voru náttföt;) Hannes Haukur fékk líka fullt af pökkum, meðal annars úlpu, liverpool búning, svæfilver, vetrargalla, fullt af dóti og fullt af fötum. Vil ég bara þakka öllum kærlega fyrir okkur. Svo þegar búið var að tæta upp pakkana fóru mamma, pabbi, Haukur, Unnur, Geysir og Narfi Freyr suðrí Ásgarð að heilsa upp á ömmu og afa og Svönu, Öglu og Báru. Við litla familían vorum bara hér heima.

Á jóladag var svo kaffi hjá ömmu og afa og fórum við þangað. Stefán Pétur frændi var þar með fjölskylduna sína þannig að við vorum þó nokkur saman komin. Hannes Haukur hafði bara gaman af að hitta nýtt fólk og þau að sjá hann. Í gær var svo jólaball í Sæborg og fórum við mamma og pabbi með Hannes Hauk. Haukur, Unnur og Narfi Freyr voru farin í land að keyra á móti foreldrum Unnar sem komu í gær og ætla að vera hér hjá okkur fram yfir áramót. Jólaballið var bara rosalega gaman og Hannes Haukur dansaði aðeins með okkur í fanginu á afa sínum. Svo komu jólasveinar í heimsókn til okkar alla leið úr Dimmuborgum í Mývatnssveit. Eftir ballið var kaffi hjá ömmu og afa og komu Haukur, Unnur, Narfi og Erna og Kiddi þangað líka. Óli var bara hér heima í Lambhaga, vildi ekki fara á jólaball eða í kaffi. Um kvöldið var svo Öldumatur hér í Lambhaga og eftir matinn var litli kúturinn var baðaður.

Í dag er svo bara ósköp venjulegur dagur eftir allt átið og kaffiboðin. Mamma fór í vinnu og pabbi líka og hin eru bara úti í Akri. Hannes Haukur sefur úti í vagninum sínum og Óli slappar af við sjónvarið. Þannig að við höfum það bara ósköp gott og notalegt hér í Lambhaganum:)

Pabbi/afi á svo afmæli í dag og fær hann kveðju í tilefni dagsins. Einnig eiga afmæli í dag Tedda og Þóra og sendum við þeim líka afmæliskveðjur. Til hamingju með daginn öll sömul.

Jæja ég held að þetta sé bara komið fínt í bili, kær kveðja frá okkur hér í Hrísey,

María og fjölskylda.

Jólin koma eftir 15 daga!!:)

Sun, 09 Dec 2007 14:24:52 GMT

Hvaða hvaða, bara verið að fara fram á nýtt blogg!

Verður maður þá ekki að vera við því og skrifa eitthvað hér inn. Ég held að síðasta færsla hafi verið eftir afmælið mitt í nóvember og er margt búið að gerast síðan þá. Ég er búin með jólakortin, búin að skreyta, baka (og borða;)), kaupa jólagjafir og pakka inn þannig að ég er klár fyrir jólin. Við Sunna hittumst hér heima hjá mér einn föstudaginn og bökuðum og gerðum konfekt, allt voðalega gott. Við Óli fórum svo í gær með Hannes Hauk til frænda í Breiðholtinu og gerðum kókossmákökur og Unnur og mamma hennar gerðu lagkökur. Svaka gaman. Litlu strákarnir, þeir Geysir, Freyr og Pjakkur voru í banastuði og voru á fullu. Pjakkur var líka rosalega hrifinn af Hannesi Hauki og HH af honum held ég bara líka og þeir svona voru aðeins að skoða hvorn annan.

Svo erum við að fara norður núna um næstu helgi og vonandi verður litli kúturinn minn búinn að jafna sig fyrir það en hann er með smá kvef núna, hósta og hor í nös. Það er lítill sem enginn hiti þannig að ég vona að hann verði ekki lengi að losna við þetta. Það er svo erfitt að vera svona lasinn/kvefaður þegar maður er lítill og getur ekki látið vita ef eitthvað er að.

Annars er bara fínt að frétta héðan.

Kveðja María.

Orðin 29 ára og sátt við lífið og tilveruna:)

Wed, 14 Nov 2007 13:46:17 GMT

Hæ, hæ.

Ég átti afmæli í gær og var með smá kaffi í tilefni dagsins. Alltaf gaman að fá fólk í kaffi, og það spillir svo sem ekki neitt fyrir að fá pakka í leiðinni;)

Ég var bara með þetta svona létt og þægilegt, var ekki neitt að standa á haus að baka eða neitt. Var með heitann brauðrétt og skúffuköku, já kökuna sem ég var að fara að gera þegar ég var að tala við þig pabbi;), og svo var ég með túnfisksalat og kex, niðurskorið grænmeti og dýfu og osta. Þetta var bara létt og ljúffengt:)

Haukur bróðir og Unnur komu og færðu mér blómvönd og svaka fallega engla kertastjaka. Auðbjörg og Gabríel gáfu mér flottann gellu bol sem er svona hálf síður og örugglega flottur við þykkar sokkabuxur eða gammosíur. Guðbjörg og Almar færðu mér rauðann bol og bleika rós sem Almar valdi sjálfur;) Eygló vinkona gaf mér svaka flotta sápu með góðri lykt. Ása amma var búin að gefa mér skálasett, grænt og voða flott. Sunna vinkona kom með háann vasa og seríur og kemur þetta vel út saman og komið út í háa gluggann hérna inni í eldhúsi. Svo komu Svana og Hrabba, ekkert smá gaman að þær skyldu kíkka til okkar. Frá þeim fékk ég jóladiskinn með þeim Friðriki Ómari og Guðrúnu Gunnars. Svo fékk Hannes Haukur helling frá þeim, til dæmis náttföt, náttslopp, samfellur-síðerma, húfu og skó og var þetta allt í geðveikt flottum töskum. Og frá Siggu og Hönnu Björg fékk ég fallegann kertastjaka sem getur verið aðventukrans og þær komu líka með blóm í blómavasa. Þannig að ég græddi alveg heilann helling og þakka alveg kærlega fyrir mig:):) Svo hringdu mamma og pabbi, Dúnný amma og Narfi Freyr og hann meira að segja söng afmælissönginn fyrir mig:) Vei, það var sungið fyrir mig:) Svo hringdu Sússa og Jenný frænka líka. Svo fékk ég líka SMS frá nokkrum vinkonum þannig að þetta var bara æðislegur dagur og alveg frábært. TAKK FYRIR KÆRLEGA!!!

Núna ætla ég að fara að drífa mig í sund af því það er eitt af heimaverkefnunum sem sálfræðingurinn minn lét mig gera. Þannig að við heyrumst seinna.

Kær kveðja María.

Nýr dagur , ný tækifæri.

Sun, 04 Nov 2007 15:07:22 GMT

Hæ, hæ elsku vinir og ættingjar.

Til að byrja með vil ég þakka fyrir góð viðbrögð við síðustu færslu. Þetta var hróp á hjálp og mér hefur borist hún og ég ætla að þiggja hana. Á morgun er ég að fara til sálfræðings í svokallaða hugræna atferlismeðferð. Veit nú samt ekki mikið meira um þetta en þið þannig að þið fáið að vita meira þegar ég er búin í fyrsta tímanum.

Ég tók síðustu færslu út af síðunni minni af því að svona leið mér en líður ekki svona í dag. Ef til vill á mér eftir að líða svona aftur en ég hef tekið fyrsta skrefið og viðurkennt hvernig ég er og hvernig mér líður stundum og verð að vera vakandi fyrir líðan minni. Núna þegar mér er farið að líða betur vil ég frekar líta fram á veginn og halda áfram á leið minni í átt til bata en ekki vera að velta mér upp úr því hvað mér leið illa á tímabili. Það er búið.

En að öðru. Í gærkvöldi var frænkukvöld hjá Hákarla-Jörundsfrænkum. Það var haldið heima hjá henni Sigrúnu, en þær systur Sigrún og Heba voru að hóa okkur saman. Ég vissi nú ekki að ég ætti svona margar frænkur8| en þetta var skemmtileg tilbreyting frá amstri dagsins. Eftir frænkuboðið var partý heima hjá Helgu Björg og ég fór þangað úr því að litli prins var sofandi heima og þurfti ekki að á mér að halda alveg strax;) Það var geggjað gaman og skemmti ég mér mjög vel. Takk kærlega fyrir mig:)

Í dag komu svo Haukur og Unnur með Geysi í heimsókn. Það var gaman að fá þau í heimsókn og auðvitað var hrært í vöfflur;) Þetta fer að vera svona hefð hjá okkur, heimsókn og vöfflur:) Geysir var hinn brattasti og fór hér um allt og þefaði af öllu og var bara sprækur. Hannesi Hauki fannst þetta nú vera eitthvað skrítið dýr en var samt pínu forvitinn og fylgdist með honum í smá stund, hvort hann væri nú nokkuð að gera neitt af sér;)

Svo á morgun er bara ný vinnuvika hjá Óla og ný vika hjá okkur Hannesi Hauki með nýjum tækifærum og viðfangsefnum. Það eru bara 6 vikur eftir hjá Óla fram að jólafríi og þá förum við norður. Ég hlakka svo til og það verður bara gaman.

Jæja ég ætla að fara að hætta þessu og sinna litla kút:) Kveðja Pollíana:)

Farin í pásu.

Wed, 19 Sep 2007 19:19:10 GMT

Hæ, hæ. Hef ákveðið að setja þessa síðu í smá pásu og flytja ykkur fréttir af okkur á síðunni hans Hannesar Hauks. Það er ekki það mikið í gangi hér að ég geti verið að skrifa um það á tveimur síðum.

Kær kveðja María.

Svona smá pínu færsla

Mon, 20 Aug 2007 19:15:47 GMT

Je minn hvað tíminn líður hratt!! Sonur minn er orðinn mánaðar gamall. Vá!! Mér finnst ekki svo langt síðan að við vorum á spítalanum. Þess vegna er um að gera að reyna að njóta þessa tíma núna með honum af því að hann kemur ekki aftur, hann er bara lítill einu sinni;)

En hann er orðinn svo duglegur. Hann var vigtaður á föstudaginn og er orðinn 5kg eða 5050gr.!!! og hefur eitthvað lengst en ég veit ekki hvað hann er langur, ef til vill búinn að lengjast um 2-4cm. Við fáum sennilega að vita það þann 31/8 en þá fer hann í 6 vikna skoðun. Hann er farinn að hjala og brosa smá og oft er voðalega gaman hjá honum. Hann er alveg á fullu að reyna að halda haus og getur það í smá stund í einu. Aðeins farinn að liggja á maganum og þá reynir hann að lyfta sér upp en getur það nú varla en samt þó..hann er bara rosalega duglegur:D og ég er svo stolt af honum. Hann elskar að horfa á svart/hvítar myndir og mynstur og ég er búin að hengja upp út um allt þannig myndir;) og líka að setja þær í rúmið hjá honum.

Helgin var bara nokkuð fín hjá okkur. Ég og Óli fórum í brúðkaup hjá vinum okkar á laugardaginn og litli prins var í pössun hjá Aubbu ömmu og Gabba afa á meðan. Það gekk rosalega vel, hann var bara hinn rólegasti yfir þessu, þetta var samt öllu erfiðara fyrir mig;) Ég var voða fegin að fá hann aftur til mín þegar við komum heim;) En þetta er samt eitthvað sem er gott að gera og byrja bara sem fyrst á af því að þá lærir hann að vera hjá öðrum en okkur og að þekkja aðra en okkur og þetta er líka gott fyrir mig og okkur Óla, að fá að vera við sjálf í smá stund en ekki alltaf mamma og pabbi;) þó svo að það sé fínt hlutverk.

Brúðkaupið gekk vel, þau sögðu bæði já hahahaha:lol: og voru voðalega hamingjusöm og hún var svaka fín brúður. Veislan var líka flott og gekk vel. Segi bara enn og aftur innilega til hamingju með daginn elsku Þóra og Guðjón og takk fyrir okkur:)

Svo á sunnudaginn eða í gær þá komu mamma og pabbi hingað til okkar á leið sinni norður en þau voru á Stykkishólmi þannig að þetta var nú ekki bein leið heim...en hvað gera ekki amma og afi til að sjá litla prins;)?!!! Ef hann hefði ekki verið kominn hingað til okkar þá hefði sko örugglega bara verið brunað beina leið heim;) En það var rosalega gaman að hitta þau og Narfi bróðir var líka með þeim þannig að það vantaði bara Hauk og Unni en þau er núna að sóla sig á strönd í Tyrklandi. Nei, nei ég er ekkert öfundsjúk:S og langar ekkert að vera þar... Jú kannski pínu en núna hef ég bara þennan gullmola hjá mér og langar bara ekkert að fara frá honum;) Seinna um daginn fórum við svo í kaffi hjá Gabríel frænda Óla en hann verður 18 ára á miðvikudaginn en hélt upp á það í gær af því hann verður ekki heima á afmælinu. Litli prins kom með okkur og allir voru rosalega ánægðir að sjá hann, nema hvað!! Og hann var bara vakandi mest allan tímann sem við vorum þar þannig að systur og frænkur fengu að máta og halda á honum;) og fannst honum það bara fínt. Takk kærlega fyrir kökurnar og til hamingju með daginn enn og aftur elsku Gabríel okkar. Svo fór yndislegur í bað þegar við komum heim og hann var svo duglegur, ósköp rólegur og góður.

Jæja þetta er bara orðin ansi fín færsla hjá mér:) Dagurinn í dag var bara rólegur og við vorum bara hér heima. En ég ætla ekki að hafa þetta lengra,

Kær kveðja María mamma;)

Nýjar myndir.

Mon, 13 Aug 2007 13:57:12 GMT

Það eru komnar nýjar myndir inn á síðuna hjá litla prins í albúmi sem heitir ágúst. Héðan er bara allt gott að frétta. Við erum dugleg að fara í göngutúra og hann bara stækkar og dafnar hjá okkur.

Kveðja María.

Hann er svo yndislegur:)

Sun, 05 Aug 2007 19:07:01 GMT

Hæ, hæ.

Þar sem litli prins er kominn með sína eigin síðu og fréttir af honum mun merkilegri en af mömmu hans verður ef til vill minna skrifað hér en áður. Vildi bara koma því á framfæri áður en allir færu að biðja um blogg;) Annars er ég nú bara hin hressasta. Tekur smá í þar sem skurðurinn er en það er nú bara eðlilegt held ég. Verð bara að fara að vera dugleg að fara með prinsinn minn í göngutúr og byrja að byggja mig upp aftur. Við erum svo að velta fyrir okkur að fara með hann í ungbarnasund þegar hann verður nógu gamall fyrir það, sem er held ég 3ja mánaða. Annars hef ég nú ekki mikið að segja. Lífið gengur sinn vanagang hér á bæ með brjóstagjöfum og bleiuskiptum og svefni þar á milli. Þannig að það er ekki mikið annað gert. Við fórum að vísu á Djúpavatn í gær en fjölsk. hans Óla fer alltaf þangað um versló. Það var ágætis tilbreyting.

Jæja mér heyrðist sá litli vera að kalla á mömmu sína þannig að við heyrumst bara.

Kveðja María N.

Held hann eigi eftir að verða matmaður mikill;)

Wed, 01 Aug 2007 16:35:03 GMT

Hæ, hæ allir saman.

Já þetta hlaut að taka endi að lokum;) Litli kútur er orðinn 12 daga gamall og braggast bara vel hér hjá okkur. Í fyrstu hélt ég að ég væri ekki að mjólka nóg handa honum en hjúkkan sem kemur heim til okkar í vitjun staðfesti annað. Hann er sko að fá ríflega hjá mér af því að á 5 dögum, frá heimkomu 25/7 til mánudagsins 30/7 þyngdist hann um 205gr. en hún sagði að normalið væri um 150-200gr. á viku!!! Þannig að ég get andað rólegar.

Ég er svo öll að koma til eftir aðgerðina. Er ennþá aðeins dofin í kringum skurðinn en mér skilst að það sé alveg eðlilegt þar sem fullt af taugum voru skornar í sundur. Svo finn ég fyrir skurðinum en ekki til í honum. Þannig að við erum bara nokkuð góð;) Svo verðum við að fara að kíkka út í vagninn, að fara í smá göngutúr af og til þannig að ég klepri nú ekki hér heima. Ekki það, það er ósköp yndælt að vera hér heima með litla prinsinum mínum. Hann er svo yndislegur. Og svo mikill karakter og ekki nema 12 daga gamall. Setur í brýrnar og sýnir óþolinmæði ef ég er of lengi að taka mig til fyrir gjöf. Hann er bara frábær og yndislegur og bestur og ég veit ekki hvað!!! Ég er svo stolt af honum.

En jæja maður verður víst að fara að gera eitthvað annað en að hanga í tölvunni;)

Kær kveðja María.

Ps Takk æðislega fyrir allar kveðjurnar og hamingjuóskirnar.

Hann er kominn með síðu

Mon, 30 Jul 2007 17:40:06 GMT

Loksins, loksins!!! Það er búið að búa til síðu handa litla prins:) Linkurinn er hér til hliðar undir fjölskylda og vinir. Ég reyni svo að vera dugleg að setja inn myndir á hana og skrifa skilaboð frá "honum";)

Ég er kominn í heiminn!!

Wed, 25 Jul 2007 17:55:39 GMT

Hæ, hæ allir saman. Hún mamma mín leyfði mér að nota síðuna sína aðeins af því hún er ekki búin að gera spes síðu handa mér en ég er búin að segja henni að hún verði að fara að drífa sig að því;)

Já ég er mættur á svæðið. Maður verður nú að láta bíða aðeins eftir sér;) og hafa fyrir sér. En þetta var sem sagt þannig að mamma og pabbi fóru inn á spítala á miðvikudaginn síðasta, en þá átti að reyna að koma mömmu af stað. Ég var nú ekki alveg á því að láta sjá mig þann daginn eða kvöldið og ekki heldur daginn eftir þó svo að læknarnir væru búnir að gefa mömmu einhver lyf sem áttu að koma mér í heiminn. Ég meina, mér leið bara ágætlega þarna inni og skil bara ekkert í því hvað öllum lá eiginlega á!! En þessi íbúð var víst ekki með framlengjanlegann leigusamning þannig að ég ákvað að koma á föstudagskvöldinu. Mamma átti í einhverjum erfiðleikum með að ná mér út úr íbúðinni, þannig að að lokum var læknir kallaður til sem bara skar gat á íbúðina mína og mér var hent út!!! Þrátt fyrir slíka meðferð þá er ég nú rosalega duglegur og hraustur strákur. Okkur mömmu kemur vel saman og svo finnst mér pabbi minn líka flottur. Við erum oft að metast um það hvor okkar geti sett meira í brýrnar og ég held að ég vinni hann auðveldlega;)

Annars þá vorum við að koma heim í dag og ég er bara sáttur við nýju íbúðina mína. Hún er svaka flott og rúmið mitt er voðalega þægilegt.

En núna vill mamma að ég fari að hætta þessu blaðri þannig að við heyrumst bara síðar,

kær kveðja litli prinsinn hennar mömmu sinnar;)

Vonandi síðasta "ólétta" færslan mín;)

Tue, 17 Jul 2007 11:30:45 GMT

Jæja þá fer þessu nú að ljúka, þó fyrr hefði verið- mun fyrr!! En þar sem ég verð búin að ganga með 42 vikur á morgun, og læknarnir vilja ekki að ég gangi lengur með þennan risa;) verð ég að öllum líkindum sett af stað annað kvöld. Það er ef elsku þrjóskupúkinn minn lætur ekki sjá sig fyrr. Annars erum við bara nokkuð hress. Ég er orðin þreytt og get ekki beðið eftir því að fá barnið mitt/okkar í fangið og fara að hugsa um það hér hjá okkur. Það er sko búið að vera allt of lengi í bumbunni.

Hann Axel á afmæli í dag, er fertugur kallinn og óskum við honum innilega til hamingju með daginn. Svo skilst mér að hann Bjarki frændi eigi líka afmæli og fær hann einnig afmæliskveðju:)

Það hefur nú ekki mikið verið gert síðustu daga nema að bíða eftir þrjóskupúkanum okkar;) Við vorum mjög dugleg að drífa okkur út í göngutúr þegar mamma var hér fyrir sunnan en eftir að hún fór aftur norður þá höfum við nú verið aðeins latari. Ég ákvað líka bara að fyrst hann vildi ekki sína sig á meðan mamma var hér þá gæti hann bara komið þegar honum hentaði og fór svona aðeins að slaka meira á og bara dúlla mér hér heima. En biðin er senn á enda og það er bæði frábært og einnig pínu skrítið. Skrítið að því leiti að ég er búin að vera með þessa bumbu svo lengi að ég held að ég eigi eftir að sakna hennar smá. Og þess að vera ólétt. Maður fékk svo mikla jákvæða athygli og allir svo spenntir og maður veit ekkert hvernig þetta verður svo. En það er bara eitthvað sem á eftir að koma í ljós. Það verður náttúrulega frábært að takast á við nýtt hlutverk og við erum bæði fyrir löngu orðin tilbúin í það en það verður samt skrítið að hafa allt í einu lítinn einstakling á heimilinu sem treystir á mann í einu og öllu. Verður samt frábært. Æi ég er nú bara að verða pínu tilfinniganæm hérna og held að ég hætti bara áður en ég fer að gráta. Er nefnilega eitthvað voðalega meir þessa daganna og það má lítið út af bera að þá er ég farin að gráta. Sennilega restin af hormónunum að ráðast á mig;)

Jæja ég hef þetta þá ekki lengra í dag. Ætli þrjóskupúkinn minn verði ekki bara kominn í heiminn þegar ég hitti ykkur næst, eða ég vona það:)